ჩრდილოეთ კორეის სამხედრო მოსამსახურეები, რომლებიც ფხენიანმა რუსეთში გაგზავნა კურსკის რეგიონში რუსული არმიის მხარდასაჭერად, მონაწილეობენ ბრძოლებში, - განაცხადა სამშაბათს აშშ-ის სახელმწიფო დეპარტამენტის სპიკერმა ვედანტ პატელმა. სააგენტო „რიონხაპის“ თანახმად, იგივე ინფორმაცია სამხრეთ კორეის სადაზვერვო სააგენტომ დაადასტურა. პატელის თქმით, რუსეთში გაგზავნილი ათი ათასზე მეტი ჩრდილოეთ კორეელი ჯარისკაცის უმეტესობა კონცენტრირებულია კურსკის რეგიონის დასავლეთ ნაწილში, მათ "რუსულ ძალებთან ერთად დაიწყეს მონაწილეობა საომარ მოქმედებებში." რუსი ინსტრუქტორების ზედამხედველობის ქვეშ კორეელი სამხედროები გადიან საარტილერიო და საცეცხლე მომზადებას, ეუფლებიან ქვეითთა საბაზისო ტაქტიკასა და, რაც მთავარია, სწავლობენ სანგრებში მყოფი მოწინააღმდეგის განადგურებას. ჩრდილოკორეელ სამხედროთა წარმატება, პატელის თქმით, რუსულ ჯარებთან ერთად მუშაობის უნარზე იქნება დამოკიდებული. დაბრკოლებას ქმნის ენობრივი ბარიერი, სამხედრო ოპერაციებისა და კომუნიკაციის მართვისა და კონტროლის ორგანიზება. ასევე ნახეთ რუსეთი კურსკზე მასშტაბურ კონტრშეტევას ამზადებს სახელმწიფო დეპარტამენტის წარმომადგენელმა განაცხადა, რომ შეერთებული შტატები "უკიდურესად შეშფოთებულია" რუსეთის გადაწყვეტილებით, ჩრდილოეთ კორეისთვის მიემართა უკრაინაში ომის საწარმოებლად დახმარებისთვის. ვაშინგტონი აგრძელებს კონსულტაციებს მოკავშირეებთან, რათა გააანალიზოს რუსეთის ამ გადაწყვეტილების შედეგები. ამერიკულ გამოცემა New York Times-ში კვირას გამოქვეყნებული სტატიის თანახმად, რუსეთმა კურსკის ტერიტორიის გათავისუფლების მიზნით, კურსკის ოლქის გარშემო თავი მოუყარა 50 000-იან დაჯგუფებას, რომელიც რუსეთის სხვადასხვა სამხედრო ოლქიდან გადმოსროლილი ნაწილების გარდა, ჩრდილოკორეულ ქვედანაყოფსაც აერთიანებს. უკრაინის სარდლობა და ოფიციალური პირები ადასტურებენ, რომ უახლოეს დღეებში მოელიან რუსეთის მასშტაბურ შეტევას კურსკის ოლქის იმ ტერიტორიების გათავისუფლების მიზნით, რომლებიც 6 აგვისტოს ბლიცკრიგით ხელთ იგდო უკრაინის არმიამ და ამ დრომდე ინარჩუნებს მათზე კონტროლს. ...