აშშ-ის არჩეულმა პრეზიდენტმა დონალდ ტრამპმა განაცხადა, რომ მისი ადმინისტრაცია კონცენტრირებული იქნება რუსეთ-უკრაინის ომზე. "ჩვენ ძალიან ბევრს ვიმუშავებთ რუსეთსა და უკრაინაზე. ეს [ომი] უნდა შეწყდეს. რუსეთი და უკრაინა უნდა გაჩერდნენ", - განაცხადა მან ფლორიდაში გამართულ ღონისძიებაზე, იუწყება CNN-ი. ამავე დროს, ამერიკელ პოლიტიკოსს არ დაუკონკრეტებია, თუ როგორ უნდა მოხდეს ეს. ერთი დღით ადრე, პრეზიდენტის ეროვნული უსაფრთხოების მრჩევლის პოსტზე წარდგენილმა მაიკ უოლცმა განაცხადა, რომ დონალდ ტრამპი მოლაპარაკებების მაგიდასთან ორივე მხარის მიყვანას გეგმავს, რითაც დასრულდება რუსეთის ომი უკრაინის წინააღმდეგ. ასევე ნახეთ ტრამპის საგარეო პოლიტიკის გუნდის კონტურები იკვეთება - რას ველოდოთ? მანამდე, Telegraph-მა ტრამპის გარემოცვაზე დაყრდნობით დაწერა, რომ აშშ-ის ახალარჩეულმა პრეზიდენტმა, როგორც ორ ქვეყანას შორის ომის გაყინვის გეგმის ნაწილი, შეიძლება მოუწოდოს ევროპულ და ბრიტანულ ჯარებს, უზრუნველყონ 800 მილის (1200 კილომეტრზე მეტი) ბუფერული ზონა რუსეთისა და უკრაინის არმიებს შორის. ამერიკული ტელეკომპანია Fox News-ის წყაროების თანახმად, აშშ-ს არჩეულმა პრეზიდენტმა ტრამპმა შეიძლება მალე დანიშნოს სპეციალური წარმომადგენელი, რომელიც "რუსეთსა და უკრაინას შორის ომის დასრულების თაობაზე მოლაპარაკებებზე" იქნება პასუხისმგებელი. ერთ-ერთმა წყარომ ტელეარხს განუცხადა, რომ საუბარია "ძალიან მაღალი რანგის სპეციალურ წარმომადგენელზე" და "დიდი ავტორიტეტის მქონე ადამიანზე", რომელსაც ტრამპი დაავალებს უკრაინის "მშვიდობიანი მოგვარების მიღწევას". 2017-2019 წლებში აშშ-ის სპეციალური წარმომადგენელი უკრაინის საკითხებში კურტ ვოლკერი იყო. ასევე ნახეთ „ამ ომის შედეგი განსაზღვრავს, როგორ ჩაიწერება ტრამპი ისტორიაში“ - ჯონ ჰერბსტი ასევე ნახეთ „ჩვენი კაცუნა“ - კრემლი ტრამპის გამარჯვებით გამოწვეულ გრძნობებს მალავს ...