„ვარ აფხაზეთში და მუშაობას გავაგრძელებ“, - ოკუპირებული აფხაზეთის ე.წ. პრეზიდენტი, ასლან ბჟანია, რომლის გადადგომასაც 15 ნოემბერს ათასობით მომიტინგე მოითხოვდა, პოსტზე დარჩენის შესახებ აცხადებს. მთელი დღის განმავლობაში ბჟანია არ გამოჩენილა. ვრცელდებოდა ინფორმაცია, რომ ის აწარმოებდა მოლაპარაკებებს ოპოზიციის წარმომადგენლებთან - პოსტიდან გადადგომის შესახებ. რამდენიმე წუთის წინ, ასლან ბჟანიამ თავის მომხრეებს მიმართა და განაცხადა, რომ პროვოკაციებს არ უნდა აჰყვნენ და, რომ პოსტზე რჩება ასევე „პრემიერ-მინისტრიც“. "ჩვენი ძალისხმევა მიმართული იქნება ამ მოვლენების [15 ნოემბერს მომხდარის] შედეგების აღმოფხვრისკენ", - განაცხადა ასლან ბჟანიამ. ასევე ნახეთ მიტინგი არ იშლება, ბჟანიას გადადგომის მოლოდინში - "მისთვის სოჭიდან ორი ვერტმფრენი ჩაფრინდა" 15 ნოემბერს, სოხუმში, მთელი დღის განმავლობაში, საპროტესტო აქცია იმართებოდა. მომიტინგეები კვლავ სოხუმის ქუჩებში დგანან. ისინი აცხადებდნენ, რომ ბჟანიას გადადგომამდე არ დაიშლებოდნენ. 15 ნოემბერს, ოკუპირებულ აფხაზეთში, მოვლენები მოულოდნელად სწრაფად განვითარდა, როცა ქუჩაში ათასობით ადამიანი გამოვიდა. დღის მეორე ნახევარში, ისინი ე.წ. პარლამენტისა და მთავრობის ადმინისტრაციის შენობებში შეიჭრნენ. იყო მცირედი დაპირისპირება, მომიტინგეების წინააღმდეგ ცრემლსადენი გაზიც გაუშვეს, მაგრამ შემდეგ - ძალოვნებს მათთვის წინააღმდეგობა აღარ გაუწევიათ. აქცია ე.წ. პარლამენტის შენობასთან, 15 ნოემბერს, დილიდან იმართებოდა - როცა სოხუმსა და მოსკოვს შორის საინვესტიციო ხელშეკრულების რატიფიცირება იყო დაგეგმილი. საკითხის განხილვა ჩაიშალა. დღის წესრიგში საკითხის შესატანად, ე.წ. დეპუტატების რაოდენობა არასაკმარისი აღმოჩნდა და სესია არ შედგა. გავრცელებული ცნობებით, სოხუმში მიმდინარე აქციის მონაწილეებმა რკინის ჭიშკარი ავტომობილით გაანგრიეს და ე.წ. პარლამენტის ტერიტორიაზე ამ გზით შეიჭრნენ. რკინის ზღუდე მათ რამდენიმე ადგილას გაარღვიეს. როგორც იუწყებიან, ამჟამად, ჭიშკარი საერთოდ მოხსნილია ე.წ. სამთავრობო შენობების გარშემო. აქციის მონაწილეები სოხუმისა და მოსკოვის საინვესტიციო ხელშეკრულების საბოლოოდ ჩაგდებას მოითხოვდნენ; ხოლო დღის მეორე ნახევრიდან, მათი მთავარი მოთხოვნა - ე.წ. პრეზიდენტის უპირობო გადადგომა იყო. ...