ოკუპირებული აფხაზეთის დე ფაქტო რესპუბლიკის საგარეო საქმეთა ყოფილი მინისტრი, ინალ არძინბა აცხადებს, რომ „რუსი მოკავშირეები“ განიცდიან აფხაზეთში მიმდინარე მოვლენებს და, რომ არაკონსტიტუციური ქმედებები აზიანებს სახელმწიფოთაშორის დიალოგს. „აფხაზეთის რესპუბლიკა სამართლებრივი, მრავალეროვანი, დემოკრატიული სახელმწიფოა. კონსტიტუციური წესრიგის დარღვევა საზოგადოებისთვის საფრთხეს წარმოადგენს. მისი დაცვა ჩვენი სახელმწიფოებრიობის გაძლიერების გარანტია“, - აცხადებს არძინბა „რია ნოვოსტისთან“ ინტერვიუში და მისი „დაჟინებული რეკომენდაციაა“ - არავინ გასცდეს სამართლებრივი ველის ჩარჩოს. რუსეთის საგარეო საქმეთა სამინისტრო, 15 ნოემბერს გამოქვეყნებულ განცხადებაში აღნიშნავდა, რომ „სამართლებრივი ველის ჩარჩოს“ ოპოზიცია გასცდა და „კონფლიქტის ესკალაციის პროვოცირება“ მოახდინა. ინალ არძინბა აფხაზეთში ყოველთვის „რუსეთის კაცად“ მიიჩნეოდა. პოსტის დატოვების შემდეგ, ის რუსეთში გაემგზავრა. არძინბა აღნიშნავს ასევე, რომ, „ახალ არჩევნებზე გამოჩნდება, თუ ვის ანდობს ხალხი ქვეყნის მართვას“. ოპოზიციონერი პოლიტიკოსები აცხადებდნენ, რომ ასლან ბჟანია მოსკოვს დამახინჯებულ ინფორმაციას აწვდიდა, თითქოს მომიტინგეები რუსეთის წინააღმდეგ გამოდიან. ასევე ნახეთ ოკუპირებული აფხაზეთის ე.წ. პრეზიდენტი ასლან ბჟანია მზადაა გადადგეს ასლან ბჟანიას გადადგომას ათასობით მომიტინგე მოითხოვს. 15 ნოემბერს, გვიან საღამოს გავრცელდა ინფორმაცია, რომ თითქოს „ხელისუფლების“ წარმომადგენლები ოპოზიციონერებთან ბჟანიას გადადგომის გეგმებს ათანხმებდნენ. თუმცა ამის შემდეგ, ბჟანიამ გააკეთა განცხადება, რომ არ გადადგებოდა. 16 ნოემბერს, ბჟანიამ განაცხადა, რომ მზად არის გადადგეს პოსტიდან, თუკი მომიტინგეები დატოვებენ „სამთავრობო შენობების კომპლექსს“. ე.წ. პარლამენტისა და მთავრობის ადმინისტრაციის შენობები აქციის მონაწილეებმა 15 ნოემბერს დაიკავეს. ფართომასშტაბიანი მიტინგი, 15 ნოემბერს, დილიდან დაიწყო - როცა სოხუმსა და მოსკოვს შორის საინვესტიციო ხელშეკრულების რატიფიცირების წინააღმდეგ. ე.წ. პარლამენტში საკითხის განხილვა ჩაიშალა. სესია არ შედგა. სოხუმში მიმდინარე აქციის მონაწილეებმა რკინის ჭიშკარი ავტომობილით გაანგრიეს და ე.წ. პარლამენტისა და მთავრობის ადმინისტრაციის ტერიტორიაზე ამ გზით შეიჭრნენ. „სამთავრობო შენობების“ გარშემო ბჟანიას მიერ აღმართული რკინის ზღუდე ამჟამად საერთოდ მოხსნილია და ხალხი ტერიტორიაზე თავისუფლად გადაადგილდება. დღის პირველ ნახევარში, აქციის მონაწილეები სოხუმისა და მოსკოვის საინვესტიციო ხელშეკრულების საბოლოოდ ჩაგდებას მოითხოვდნენ; ხოლო დღის მეორე ნახევრიდან, მათი მთავარი მოთხოვნა - ე.წ. პრეზიდენტის უპირობო გადადგომა იყო. აფხაზეთის ოკუპირებულ რეგიონში, ე.წ. პრეზიდენტის გადადგომის მოთხოვნით შექმნილი საკოორდინაციო სა...