ირანის საგარეო საქმეთა მინისტრმა, აბას არაყჩიმ 16 ნოემბერს განაცხადა, რომ რჩება "შეზღუდული შესაძლებლობა" ბირთვული მოლაპარაკებების გამართვისა დასავლეთთან - იუწყება ირანის სახელმწიფო მედია. თეირანსა და აშშ-ს შორის კავშირები განსაკუთრებულად დაძაბულია მას მერე, რაც დონალდ ტრამპი პრეზიდენტობის პირველ ვადაში, 2015 წელს ცალმხრივად გამოვიდა ირანსა და მსოფლიოს წამყვან ქვეყნებს შორის მიღწეული ბირთვული ხელშეკრულებიდან და ირანს მკაცრი სანქციები აღუდგინა. "დიპლომატიის შესაძლებლობა კვლავაც არის, თუმცა ეს შესაძლებლობა არ არის დიდი. ეს შეზღუდული შესაძლებლობაა" - არაყჩის ამ სიტყვებს სახელმწიფო ტელევიზია ავრცელებს. ირანის ნაბიჯების თაობაზე დასავლეთის შეშფოთება გაღრმავდა ღაზის სექტორში ერთი წლის განმავლობაში მიმდინარე ომის ფონზე. ტრამპი იანვარში ბრუნდება თეთრ სახლში, მიმდინარე თვეში საპრეზიდენტო არჩევნებში გამარჯვების შემდეგ. მიმდინარე კვირაში გაეროს ატომური ენერგიის სააგენტოს (IAEA) ხელმძღვანელმა, რაფაელ გროსიმ ირანს და მის გლობალურ პარტნიორებს მოუწოდა მიაღწიონ "კონკრეტულ, ხელშესახებ და აშკარა შედეგებს" მოლაპარაკებებში თეირანის ბირთვული პროგრამის შესახებ - რადგან ტრამპის პრეზიდენტად დაბრუნება შესაძლოა ნიშნავდეს დიპლომატიის ფანჯრის დახურვას. ასევე ნახეთ ირანი "კატეგორიულად უარყოფს" მისი ელჩის მასკთან შეხვედრას ...