თურქეთის პრეზიდენტმა რეჯეპ ტაიპ ერდოანმა მოამზადა უკრაინაში ომის გაყინვის გეგმა, რომლის წარდგენასაც 18 ნოემბერს გეგმავს რიო-დე-ჟანეიროში, „დიდი ოცეულის“ (G20) სამიტზე. ამის შესახებ Bloomberg-ი იუწყება წყაროებზე დაყრდნობით. სააგენტოს თანამოსაუბრეების თქმით, ერდოანი უკრაინის პრეზიდენტ ვოლოდიმირ ზელენსკის შესთავაზებს ნატოში გაწევრიანების გადადებას მინიმუმ 10 წლით „პუტინისთვის დათმობის სახით“. ასევე შეთავაზებულ იქნება დემილიტარიზებული ზონის შექმნა დონბასის აღმოსავლეთით და იქ საერთაშორისო ჯარების განთავსება „დამატებითი გარანტიის სახით“. ერდოანის გეგმის კიდევ ერთი პუნქტია უკრაინისთვის იმის გარანტიის მიცემა, რომ კიევი სამხედრო დახმარებას მიიღებს ნატოში გაწევრიანებაზე უარის სანაცვლოდ. თურქეთის ხელისუფლების წარმომადგენლებმა Bloomberg-ს განუცხადეს, რომ უკრაინას გაუჭირდება ასეთი წინადადების მიღება, მაგრამ, მათი აზრით, ეს „ყველაზე რეალისტური მიდგომაა“. ისინი ასევე ისურვებდნენ, გადადონ მოლაპარაკებები რუსეთის ჯარების მიერ ოკუპირებული უკრაინული ტერიტორიების ბედზე, რათა ყურადღება მიმართულ იქნეს ცეცხლის სტაბილური შეწყვეტის უზრუნველყოფაზე. ასევე ნახეთ „ამ ომის შედეგი განსაზღვრავს, როგორ ჩაიწერება ტრამპი ისტორიაში“ - ჯონ ჰერბსტი სააგენტო აღნიშნავს, რომ წინადადება შესაძლოა მოეწონოს უკრაინის ზოგიერთ მოკავშირეს, რომლებიც შიშობენ, რომ ნატოში ქვეყნის წევრობამ შეიძლება კრემლთან პირდაპირი კონფლიქტი გამოიწვიოს. ერდოანი იმედოვნებს, რომ მას შეუძლია დაარწმუნოს ზელენსკი, დაესწროს სამშვიდობო მოლაპარაკებებს სტამბოლში, რადგან, სადაზვერვო მონაცემებით, უახლოეს თვეებში უკრაინამ შეიძლება მეტი ტერიტორია დაკარგოს, თუ საბრძოლო მოქმედებები არ შეჩერდება. ორმა ევროპელმა ოფიციალურმა პირმა განუცხადა Bloomberg-ს, რომ უფრო მეტი ადამიანი აღიარებს, რომ ზელენსკის მოუწევს პუტინთან კომპრომისზე წასვლა, რადგან ცხადი ხდება, რომ ვერცერთი მხარე ვერ მოიპოვებს გადამწყვეტ გამარჯვებას. ასევე ნახეთ ინტერაქტიური რუკა: უკრაინის ჯარების შესვლა კურსკის ოლქში აღნიშნავენ, რომ ომის შეწყვეტის სურვილი მას შემდეგ გაიზარდა, რაც ჩრდილოეთ კორეის ჯარები კონფლიქტში ჩაერთნენ რუსეთის მხარეს. G20-ის ზოგიერთი წევრი ქვეყნის შეფასებით, კორეის სახალხო-დემოკრატიულ რესპუბლიკას შეუძლია 100 ათასამდე ჯარისკაცი გაგზავნოს რუსეთში. ვოლოდიმირ ზელენსკიმ ადრე განაცხადა, რომ უკრაინისთვის მიუღებელია პუტინის მიმართ „დათმობები“ და რომ ეს ევროპისთვის „თვითმკვლელობა“ იქნებოდა. ამავე დროს, მან აღიარა, რომ რამდენიმე ევროპელი ლიდერი „მტკიცედ“ უჭერს მხარს კიევის მხრიდან ასეთ დათმობებზე წასვლას. უკრაინისა და რუსეთის პრეზიდენტები არ დაესწრებიან G20-ის სამიტს, რომელზეც გეგმავს ერდოანი თავისი წინადადების წარდგენას. Bloomber...