სახალხო დამცველი განცხადებას აქვეყნებს გამთენიისას ჭავჭავაძისა და მელიქიშვილის გამზირების კვეთაზე მიმდინარე აქციის დაშლასთან დაკავშირებით. სახალხო დამცველის თანახმად, "იმ დროისთვის (08:18, 19.11.2024), როდესაც შინაგან საქმეთა სამინისტრომ დაიწყო1 მელიქიშვილის გამზირზე მყოფი აქციის მონაწილეების დაკავება, აქცია ატარებდა მშვიდობიან ხასიათს და ჯდებოდა შეკრების თავისუფლების სტანდარტებში". ომბუდსმენი განცხადებაში აღნიშნავს, რომ "ამ დროს მოქალაქეებზე პოლიციის მხრიდან შესაძლოა ადგილი ჰქონდა არასათანადო მოპყრობას თუ ძალის გადამეტების ფაქტებს". სახალხო დამცველი წერს, რომ დააკავეს ჟურნალისტი სერგი ბარამიძე, რომელიც დაკავების დროს პროფესიულ საქმიანობას ახორციელებდა. "სახალხო დამცველი ხაზგასმით აღნიშნავს, რომ დაუშვებელია ჟურნალისტისთვის პროფესიულ საქმიანობაში ხელშეშლა". "მთავარი არხის" ოპერატორი სერგი ბარამიძე და აქციაზე დაკავებული რამდენიმე ადამიანი ხელწერით გაათავისუფლეს. ასევე ნახეთ აქციაზე დაკავებული ქალები და „მთავარი არხის“ ოპერატორი ხელწერილით გაათავისუფლეს - რას ჰყვებიან ისინი "სახალხო დამცველი მოუწოდებს შინაგან საქმეთა სამინისტროს უზრუნველყოს აქციის მონაწილეთა მშვიდობიანი შეკრების თავისუფლება, ხელი არ შეუშალონ ჟურნალისტებს საქმიანობის განხორციელებაში, ხოლო, დაკავების ღონისძიებებისა და სპეციალური საშუალებების გამოყენებისას იხელმძღვანელონ აუცილებლობისა და პროპორციულობის კრიტერიუმების მკაცრი დაცვით. ამასთან, სახალხო დამცველი მოუწოდებს სპეციალურ საგამოძიებო სამსახურს გამოიძიოს ჟურნალისტთა/აქციის მონაწილეთა წინააღმდეგ თითოეული შესაძლო დანაშაულის ნიშნების მქონე შემთხვევა და მოახდინოს საზოგადოების ინფორმირება". შინაგან საქმეთა სამინისტროს ჯერჯერობით არ გაუვრცელებია ინფორმაცია აქციაზე დაკავებულების შესახებ. „ახალგაზრდა იურისტთა ასოციაციის“ ხელმძღვანელი ნონა ქურდოვანიძე სოციალურ ქსელში წერს, რომ ამ დროისათვის, ორგანიზაციის ცხელ ხაზზე 12 დაკავებულის შესახებ შევიდა ინფორმაცია. ამასთან, სამი ორგანიზაციის - "საერთაშორისო გამჭვირვალობა-საქართველოს", "სამართლიანი არჩევნებისა და დემოკრატიის საერთაშორისო საზოგადოებისა" და "სამოქალაქო საზოგადოების ფონდის" - ხელმოწერით გავრცელებულ განცხადებაში ნათქვამია, რომ გმობენ "მშვიდობიან მოქალაქეებზე ძალადობრივ აქტს" და მოუწოდებენ "შინაგან საქმეთა სამინისტროს იმოქმედოს კანონის მოთხოვნების შესაბამისად, არ დაემორჩილონ მმართველი პარტიის უკანონო დავალებებს და იმოქმედონ საქართველოს კანონმდებლობის შესაბამისად". ისინიც ეხმაურებიან უკვე გათავისუფლებული სერგი ბარამიძის საკითხს, ასევე აღნიშნავენ, რომ სამართალდამცველებმა "ფიზიკუ...