"საამისოდ მზადება მიმდინარეობს. მისიის შესახებ უფრო მეტი დეტალი შესაფერის დროს გახდება ცნობილი", - უპასუხა წერილობით რადიო თავისუფლებას პეტერ სტანომ, ევროკომისიის სპიკერმა საგარეო ურთიერთობათა საკითხებზე. გარდა ამისა, პეტერ სტანოს თანახმად, ევროკავშირის წევრი სახელმწიფოების წინაშე მოხსენებით წარდგება ეუთო/ოდირის სადამკვირვებლო მისიის ხელმძღვანელი, რომელიც შეაფასებს, "როგორ უპასუხეს საჩივრებს საარჩევნო დარღვევებზე". საქართველოში ტექნიკური მისიის გაგზავნის შესახებ 18 ნოემბერს ილაპარაკა ჟოზეპ ბორელმა, ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში. ასევე ნახეთ ევროკავშირი არჩევნების შემსწავლელ მისიას გამოგზავნის - მინისტრების „სევდიანი დისკუსია“ საქართველოზე ევროკავშირის წევრი სახელმწიფოების საგარეო საქმეთა მინისტრების საბჭოს დასრულების შემდეგ, ბორელმა თქვა, რომ სპეციალურად შექმნილი მისია ადგილზე გამოიკვლევს, რა მოხდა საქართველოში ჩატარებულ არჩევნებზე. „იმან, თუ როგორც ჩატარდა საპარლამენტო არჩევნები, დაადასტურა ამჟამინდელი მთავრობის დემოკრატიული უკუსვლა“, - განაცხადა 18 ნოემბერს ევროკავშირის მთავარმა დიპლომატმა. ჯერჯერობით უნგრეთი ევროკავშირის ერთადერთი წევრი სახელმწიფოა, რომელმაც მმართველ პარტიას, "ქართულ ოცნებას", არჩევნებში გამარჯვება საჯაროდ მიულოცა. 26 ოქტომბრის არჩევნების შედეგებს აღიარებს სლოვაკეთიც. ევროკავშირის წევრი სახელმწიფოების ნაწილი კი ამისგან ამ ეტაპზე თავს იკავებს. „[ლიეტუვა] საქართველოში ჩატარებულ არჩევნებს თავისუფლად და სამართლიანად არ მიიჩნევს“, - თქვა 18 ნოემბრის საგარეო საქმეთა მინისტერიალის დაწყებამდე გაბრიელიუს ლანდსბერგისმა, ლიეტუვის საგარეო საქმეთა მინისტრმა. ლიეტუვა აგრეთვე გამოდის მოწოდებით, რომ საქართველოში ჩატარებული საპარლამენტო არჩევნების შესახებ "დამოუკიდებელი საერთაშორისო გამოძიება" ჩატარდეს. ლანდსბერგისის თქმით, მრავლისმეტყველი იქნება, თუ "ქართული ოცნება" ამაზე უარს იტყვის. 19 ნოემბერს ჟოზეპ ბორელის განცხადებას ტექნიკური მისიის შესახებ გამოეხმაურნენ "ქართულ ოცნებაში". თბილისის მერმა კახა კალაძემ თქვა, რომ საქართველოს ხელისუფლება საერთაშორისო მისიასთან ითანამშრომლებს. "რა თქმა უნდა, ჩვენ გვაქვს მზადყოფნა. არანაირი პრობლემა არ არსებობს. არჩევნების მეორე დღესვე, პრემიერ-მინისტრი გამოვიდა და პირდაპირ თქვა, თუკი რაიმე კითხვები არსებობს, აგერ არის საარჩევნო ურნები და დათვალეთო", - უპასუხა კახა კალაძემ მედიის შესაბამის შეკითხვას. ასევე ნახეთ კალაძის თქმით, მთავრობა ითანამშრომლებს ევროკავშირის მისიასთან, რომელსაც მდინარაძე "არარსებულს" უწოდებს მაგრამ მმართველი პარტიის აღმასრულებე...