21 ნოემბერს სლოვაკეთის პრემიერ-მინისტრმა რობერტ ფიცომ განაცხადა, რომ ის სერბეთის პრეზიდენტ ალექსანდარ ვუჩიჩთან ერთად დაესწრება 2025 წლის მაისში ფაშიზმზე გამარჯვების 80 წლისთავისადმი მიძღვნილ სამხედრო აღლუმს მოსკოვში. "ჩვენ შევთანხმდით, რომ ერთად წავალთ მოსკოვში, რადგან ერთნაირად ვცემთ პატივს იმ ქვეყნებს, რომლებიც მონაწილეობდნენ ჩვენი ქვეყნების განთავისუფლებაში მეორე მსოფლიო ომის ბოლოს", - განაცხადა ფიცომ ბელგრადში, სადაც ოფიციალური ვიზიტით იმყოფება. ასევე ნახეთ ფიცო აცხადებს, რომ სანამ პრემიერია, სლოვაკეთი მხარს არ დაუჭერს ნატოში უკრაინის მიღებას რადიო თავისუფლების ბალკანური სამსახურის ცნობით, რობერტ ფიცო და ალექსანდარ ვუჩიჩი ერთმანეთს 21 ნოემბერს ბელგრადში შეხვდნენ. ფიცომ "ესკალაციისკენ" მიმართული ნაბიჯი უწოდა კიევისათვის აშშ-ის შორი მოქმედების რაკეტების, ATACMS-ის გამოყენების ნებართვის მიცემას. ეს ნაბიჯი გააკრიტიკა ალექსანდარ ვუჩიჩმაც, რომელმაც აღნიშნა, რომ არ გაჰკვირვებია 21 ნოემბერს რუსეთის მიერ საკონტინეტთაშორისო ბალისტიკური რაკეტის გამოყენება. "თუ ვინმე ფიქრობს, რომ დასავლეთის ქვეყნებიდან მიღებული ნებისმიერი იარაღიდან გაუხსნით ცეცხლს რუსეთის ფედერაციას და პუტინი პასუხს არ დაგიბრუნებთ, მაშინ ან მას არ იცნობთ, ან არანორმალური ხართ", - თქვა სერბეთის პრეზიდენტმა. 21 ნოემბერს რუსეთმა უკრაინაზე შეტევისთვის საკონტინენტთაშორისო ბალისტიკური რაკეტაც გამოიყენა. ამ კლასის რაკეტების აღჭურვა შესაძლებელია ბირთვული საბრძოლო ნაწილებითაც და განკუთვნილია შორ მანძილზე მდებარე სტრატეგიულად მნიშვნელოვან ობიექტებზე დარტყმისთვის. უკრაინის საჰაერო ძალების ინფორმაციით, რუსეთის ასტრახანის ოლქიდან გაშვებული იყო საკონტინენტთაშორისო ბალისტიკური რაკეტა, ტამბოვის ოლქიდან, გამანადგურებელ მიგ-31კ-დან - აერობალისტიკური რაკეტა „კინჟალი“ და ვოლგოგრადის ოლქიდან, ტუ-95მს ტიპის ბომბდამშენებიდან - შვიდი ფრთოსანი რაკეტა Х-101. ოფიციალური მონაცემებით, უკრაინელმა სამხედროებმა ექვსი ფრთოსანი რაკეტა ჩამოაგდეს. ასევე ნახეთ რუსეთმა უკრაინაზე შეტევისთვის საკონტინენტთაშორისო ბალისტიკური რაკეტაც გამოიყენა - საჰაერო ძალები ...