აშშ-ის რესპუბლიკელმა კონგრესმენმა მეტ გეცმა ოფიციალურად მოხსნა თავისი კანდიდატურა გენერალური პროკურორისა და იუსტიციის სამინისტროს ხელმძღვანელის პოსტზე. ის ამ თანამდებობაზე არჩეულმა პრეზიდენტმა დონალდ ტრამპმა წარადგინა. გეცმა განაცხადა, რომ ამ პოსტზე მისი დამტკიცება შეიძლებოდა ქცეულიყო ტრამპის ახალი ადმინისტრაციის სამზადისის პროცესში ხელისშემშლელ ფაქტორად. მას მიაჩნია, რომ ვაშინგტონში გრძელვადიანი უთანხმოების დრო არ არის და იუსტიციის სამინისტრო მზად უნდა იყოს, იმუშაოს ტრამპის საპრეზიდენტო ვადის პირველივე დღიდან. "მე ყოველთვის ამაყი ვიქნები, რომ პრეზიდენტმა ტრამპმა ამ თანამდებობაზე დამასახელა და დარწმუნებული ვარ, რომ ის ამერიკას გადაარჩენს", - განაცხადა გეცმა. 24 ნოემბერს ამერიკის შეერთებული შტატების პრეზიდენტად არჩეულმა დონალდ ტრამპმა იუსტიციის მინისტრობის კანდიდატად წარადგინა 42 წლის კონსერვატორი კონგრესმენი მეტ გეცი. აშშ-ში იუსტიციის მინისტრი ქვეყნის გენერალური პროკურორიცაა. ასევე ნახეთ ტრამპმა გენერალური პროკურორის პოსტზე წარადგინა საეჭვო რეპუტაციის კონგრესმენი გენერალური პროკურორის თანამდებობაზე გეცის კანდიდატურა სადავო გახდა, რადგან მის მიმართ 2020 წლიდან არსებობს ეჭვები ბავშვების სექსუალურ ექსპლუატაციასთან სავარაუდო კავშირის, ნარკოტიკული საშუალებების უკანონოდ გამოყენებისა და ქრთამის აღების შესახებ. იუსტიციის სამინისტრომ გამოძიების საფუძველზე უარი თქვა კონგრესმენისთვის ბრალის ოფიციალურად წარდგენაზე, თუმცა 2021 წლიდან გეცის მიმართ გამოძიება მიმდინარეობს კონგრესის წარმომადგენელთა პალატის ეთიკის კომისიაში. თავად კონგრესმენი ყველა ბრალდებას უარყოფს. ...